Premyerası keçən ilin avqustunda Sarajevo Film Festivalında baş tutan və Heart of Sarajevo – “Ən yaxşı rejissor mukafatı”nı qazanan Rejissor Rüfət Həsənovun “Daxildəki ada” filmi “94-cü Akademiya Mükafatlarında (Oskar) Azərbaycanın namizədi olaraq təsdiq edilib.
Azərbaycan kino tarixində önəmli yeri olan olan “Buqələmun” və #YoxduBeləSöhbət filmlərinin rejissoru Rüfət Hasanovun növbəti əsəri olan “Daxildəki ada” filmində baş rolu Orxan Ata ifa edib. Filmin operatoru Orxan Abbasov, rəssam Elturan Məmmədov, prodakşn assistenti Kamran Ağabalayev, geyim üzrə rəssam isə Leyla Mədətxanovadır.
Film Azərbaycanın beynəlxalq dərəcəli şahmat ustası Seymur Tahirbəyovun, dünya çempionatı finalı öncəsi özünü ailə-məişət problemləri labirintində necə itirməsindən, sonra isə başını götürüb bir nəfər sakini olan adaya qaçmasından bəhs edir.
AzLogos filmlə bağlı baş rol ifaçısı, aktyor Orxan Ata ilə danışıb:
«Hesab edirəm ki, filmin uğuru bilavasitə onun rejissorundan asılı olan bir şeydir. Rejissor o filmi nə qədər çox qorusa, lazımi yerlərdə pr etsə, əsər də bir o qədər dəyər qazanacaq. Məhz buna görə deyə bilərik ki, “Daxildəki ada” komandası rejissoruna görə çox şanslıdırlar.
Rüfət Həsənov bu mərhələdən sonra birbaşa Azərbaycan lobbisinə pas vermiş oldu. Bundan sonrası Azərbaycanın ABŞ-dakı lobbisindən, Los-Angelesdəki konsulluğundan asılıdır. Azərbaycan, bu filmin Akademiya avardlarında yarışmağında maraqlıdır, ya yox, bundan sonra görəcəyik. Həm də baxaq görək Azərbaycan üçün «şahmat ölkəsi» imici vacibdir, lazımlıdır, ya yox?»
AzLogos olaraq başda rejissor Rüfət Həsənov olmaqla, Daxildəki ada filminin bütün heyətinə bu nüfuzlu yarışmada uğurlar arzulayırıq.
