ONA.az, DİN və seqreqasiyaya dair

Azərbaycanlılardan utanaraq, onları əcnəbi turistlərdən gizlətmək istəyən və yaxud, bu məlumatı məqsədli şəkildə mediaya ötürən struktur(lar) həmişəki kimi, cavab anı yetişəndə dediklərini inkar edib, mətbuatı zərbə altında qoyurlar.

Biz, AzLogos olaraq çox yaxşı bilirik ki, Ona.az özbaşına belə bir xəbəri yaymaz, “hüquq-mühafizə orqanlarına” (niyə DİN yox?) istinad etməzdi. Biz deyirik ki, “çoxsaylı əcnəbilərin rahat, maneəsiz və sərbəst gəzintilərinin təmin edilməsi üçün may ayının 25-dən 31-dək paytaxtın bəzi mərkəzi küçə və meydanlarında” azərbaycanlılara gəzməyi qadağan edən hər kimdirsə, çıxsın qabağa və izah etsin, necə olub, belə bir sevdaya düşüb? O kimdir ki, ölkə vətəndaşlarına küçələrdə gəzməyi qadağan edir (məhdudlaşdırır)?

Yoxsa bizim nə ONA ilə, nə başqası ilə işimiz yoxdur. Hamısına uğurlar diləyirik, hər kəs bildiyi yolla getsin. Özgə, düşmən tanımırıq. Bizim üçün hər kəs həmkardır, qaldı ki, ONA-da işləyən dostlarımız, hörmət etdiklərimiz var.

AzLogos mümkün qədər Azərbaycanın mənasız siyasi gündəmindən – görməmiş hökumətindən, retroqrad müxalifətindən, çuşkarizmdən uzaq qalmağa çalışsa da, bəzi məsələlər var ki, orda susmaq olmur. Çoxumuz Avropada yaşayırıq, dost-tanışımız, kolleqalarımız var, bəziləri hətta doğmalaşıblar yerlilərlə. O xəbəri tərcümə edib yaymaq bir saniyənin işidir (bəlkə də yayılıb çoxdan). Belə bir xəbər, komfortunu düşündüyünüz, qeydinə qaldığınız avropalıların əlinə keçsə, oxusalar, sizə nifrət edərlər. Ölkəyə yox, insanlarına yox, sizə yəni ölkə rəhbərliyi ilə assosiasiya olunan obraza. 

“Hüquq-mühafizə orqanları”na medianı əzməyə icazə verməyəcəyik. Xəbəri ötürüb, sonra təkzib etmək – medianı əzmək, simasızlaşdırmaqdır.

Bizim “Taxt-tac oyunları” ilə işimiz yoxdur, özünüz bilərsiniz – kim kimi vurur, harasından vurur, amma ilin-günün bu vaxtı “ali irq – aşağı irq” söhbəti eləyənlərə də, aman vermək fikrimiz yoxdur.  

Slenq-ə və narahatlığa görə üzr istəmirik.