“Marmara Forum” ticarət mərkəzində uşaq oyun meydançası

CARVE memarlıq şirkəti Türkiyədə yerləşən “Marmara Forum” ticarət mərkəzinin rekreasiyası üçün terasda uşaq oyun ərazisi inşa edib. 400 m2 ərazini əhatə edən bu layihə son dərəcə rəngarəng (estetik) və funksional bir konseptdir. Memarlıqda estetika və funksionallıq ən vacib şərtdir.

Ticarət mərkəzlərində teras mərtəbələr adətən əyləncə və qidalanmaq üçün istifadə olunur. Marmara Forum-da yenilənən teras mərtəbə eyni zamanda bu ərazi üçün yeni cazibə mərkəzi tələb edirdi. Elgar Blitz (CARVE direktoru) açıq hava məkanını özünəməxsus səviyyədə həll etmiş kimi görünür.

Oyun mərkəzi müxtəlif yaş qrupları üçün müxtəlif məkanlar təklif edir. Adətən belə dizaynların estetika-funksionallıq balansı olduqca kəskin pozulur. (Hesab edirəm ki, bu, çox təbiidir). Əlbəttə bu, memarlığın fundamental prinsipinə də zidddir.

Konsept “yerdən yüksələrək buludlara toxunma təcrübəsi” adlanır. CARVE dizaynın forması ilə istifadəçilər (müxtəlif yaş qruplarına aid uşaqlar) arasında maraqlı bağlantı qurmağı hədəfləyir.

Uşaq oyun məkanları adətən sərhədlənmiş, çərçivələnmiş olmalıdır. Bu, memarlıqda məkanın etibarlılığını artırır, müxtəlif diskomfortlardan azad edir, paradoksal olsa da istifadəçilərin özlərini daha azad hiss etməsini təmin edir.

Dizayn, içərisində sərbəst oyunu mümkün edən böyük həcmli kürələrdən ibarətdir.

Layihə 4 müxtəlif yaş qrupları üçün ayrı məkan seçimləri ilə qarşımıza çıxır – kiçik uşaq ərazisi, dırmaşma qübbəsi, böyük kürələr məkanı, 8 metr yüksəkliyində daxili oyun mərkəzi.

Dəmir strukturdan ibarət “Bulud” adlandırılan kürələrin içi tamamilə oyun elementləri ilə əhatə olunmuşdur. Uşaqlar dırmaşır, sürüşür, asılmış hörümçək torlarında uzana bilir, rəngli çərçivələrdən şəhərin siluetini izləyə bilir. Oyun buludlarının içərisində yerləşən polarizer çərçivələrdən və ya dikroik pəncərələrdən şəhərə baxmaq olduqca möhtəşəmdir. Bu, bizə (yaşlı uşaqlara) sadəcə estetik görünsə də, uşaqlarda həqiqi dünya ilə xəyal dünyasını eyni anda yaşamağa kömək edir.