OMA və GMP memarlıq şirkətləri Çində keçirilən “Çendu Elm və Texnologiya şəhəri” Masterplan və Dizayn müsabiqəsinin qalibləri seçildi. Layihənin qərbində Beynəlxalq Təhsil Parkı və GMP-nin rəhbərlik etdiyi Tranzit İnkişafı qurumunu əhatə edəcək ümumi master planın ilkin mərhələsini görürük. Pilot layihə, Çendunun şərqindəki yeni hava limanı ətrafında şəhərin inkişafına təkan verən yenilikçi sənayenin bir hissəsidir.
Çendu Çinin mərkəzi hissəsində yerləşən şəhərdir. Həm də Sıçuan əyalətinin inzibati mərkəzi hesab olunur.
460.000 kvadratmetrlik Beynəlxalq Təhsil Parkına bir çox universitet üçün təhsil proqramı, yataqxanalar, dövlət proqramları ofisləri, milli laboratoriyalar və innovasiya ofisləri daxil olacaqdır. Komandanın qeyd etdiyi kimi, binalar abadlaşdırılmış teraslara sahib olacaq və ərazinin təbii relyefinin bir uzantısına çevriləcəkdir. Kampusun mərkəzi bir vadi tərəfindən təşkil ediləcək və əlamətdar bir kompleks binasını əhatə edəcəkdir. 80.000 kvadrat metrlik bina təhsil həyatının mərkəzini təşkil edəcək və bir universitet kitabxanası, tələbə mərkəzi, auditoriyalar, laboratoriyalar və ofislərdən ibarət olacaq.
OMA Şirkətindən olan Chris van Duijn: “Bu layihə ilə ənənəvi avtomobil yönümlü yol şəbəkəsinə əsaslanan tipik master plana alternativ təqdim edəcəyimizi ümid edirik. Kompleksin coğrafiyasında köklü bir dizayn yaratmaq niyyətindəyik. Memarlıq və landşaft arasındakı əlaqənin, yenilikçi fikirlərə ilham verəcək təhsil üçün dinamik bir mühitlə nəticələnəcəyinə ümid edirik.” OMA dizaynına Chris van Duijn, koordinasiyaya Ravi Kamisetti nəzarət edir. Proyektə John Thurtle rəhbərlik edir.
Layihə məlumatı:
Adı: Çendu gələcək elm və texnologiya şəhərinin başlama sahəsi masterplan & memarlıq dizaynı.
Yer: Çendu gələcək elm və texnoloji şəhərinin Tianfu beynəlxalq hava limanına bitişik ərazisi.
Müştəri: Çendu hi-tech sənaye inkişaf zonasının islahat və planlaşdırma idarəsi bürosu.
Proqram: Masterplan, tranzit yönümlü inkişaf (TOD).
Ofislər: 605.400 kvm; xidmət mənzilləri 417.000 kv. yaşayış sahəsi 324.000 kv; laboratoriyalar 394.400 kvadratmetr; ictimai obyektlər 293,860 kvm; ticarət mərkəzi 262.100 kvadratmetr; mədəniyyət mərkəzi 161.140 kvadratmetr; müəssisələr 85.400 kvadratmetr; cəmi: 2.750.300 kv.
Bu, Çində salınan yüzlərlə yenilikçi memari layihədən sadəcə biridir. Çendu şəhərinin iqtisadi önəmi belə layihələr ilə şəhərin imicini dəyişmək zərurətini yaradır. Ümumiyyətlə Çinin fantastik iqtisadi böyüməsi onun memarlığından, şəhərsalmasından yan keçmir. İnanılmaz dərəcədə dəqiqliklə icra olunan layihələrə baxdıqca “camaatın uşağı necədir, bizimkisi necə” kompleksinə girməmək mümkün deyil. Təbii ki, ölkəmizi Çin kimi nəhəng ilə müqayisə eləmək axmaqlığına qapılmıram, əsla. Sadəcə heyranlıqla izləyirəm. Bir, orada inşa olunan kompleksləri, şəhərləri, qəsəbələri, bir də bizdə izləyirəm yeni salınan parkları, binaları. Axı hər şey üsuluna uyğun olsa, onlar ilə aramızda belə kəskin fərq yaramazdı. Əminəm ki, belədir. Şəhərlərə, qəsəbələrə, parklara ayrılan milyonlar… Adam fikirləşdikcə havalanır. Bu cür büdcələr ilə, bu cür bərbad layihələrin ortaya çıxması xüsusi bacarıq və istedad tələb edir!
Bir müddət əvvəl prezident İlham Əliyevin açılışında iştirak etdiyi, yeni salınan Meşə parkının görüntülərini zlədim. Sadəcə susdum, nəsə yazmaq istədim, amma susdum. Yazılacaq sözləri beynimdə bir-birinə bağlayıb, cümlə qura bilmədim. Buna baxmayaraq mən hələ də nikbinəm…
