Bu gün kiber hücum, demək olar ki, hər bir internet istifadəçisinin başına gələn hadisələrdəndir. Əldə edilən böyük pullar sayəsində kiberhücum dəstələri böyüyür və artıq çoxmillətli olur. Buna görə əməliyyatlar birdən çox ölkədə aparılmalı olur.
Ötən illərdə təxminən 41.000 istifadəçiyə təsir göstərən GozNym adlı zərərli proqramla insanlara ümumi 100 milyon dollara yaxın maddi ziyan vuran çoxmillətli bir dəstə 2016-cı ilin sonlarında həbs edilmişdi. Bu həftə cinayətkarların məhkəməsi baş tutdu.
Komandanın lideri Krasimir Nikolov ABŞ və Gürcüstanın ortaq həyata keçirilən əməliyyatında yaxalanmış və ABŞ-a deportasiya edilmişdi. Nikolov aprel ayında mühakimə olundu və 39 ay həbs cəzasına məhkum edildi. Cəzasının sonunda Nikolov Bolqarıstana deportasiya ediləcək.
Komandanın digər iki üzvü – Aleksandr Konolov və Marat Kazandjian isə bu həftə keçirilən məhkəmədə Gürcüstanda müddətli həbs cəzasına məhkum edildi. FBI bu cəzaların kiber cinayətkarlara qarşı susmayacaqlarının göstəricisi olduğunu açıqladı.
GozNym dəstəsi layiq olduğu cəzanı alsa da, çox sayda kiber cinayətkar dəstə insanlara zərər verməyə davam edir. Bəziləri dövlət tərəfindən maliyyələşdirildiyi üçün onları tapmaq mümkün deyil. Bəziləri isə ABŞ ilə deportasiya razılaşması olmayan ölkələrin yavaş hərəkət etməsi səbəbindən hələ də azadlıqdadır.
Səhifəmizdə hər hansı səhv və ya qeyri-dəqiq məlumat gördükdə, həmin mətni seçib Ctrl+Enter düymələrini sıxaraq bu barədə bizə məlumat verməyinizi xahiş edirik.
